الخميس، 21 مايو 2009

مواقف بنات !!


وصلني بالايميل واكتشفت وايد اشياء تصير فيني صج لوول



اخيس شي لما تكونين مخطوبة والا عندج مناسبة مهمة وتطلع بويهج نفرة لااا وتتسلط بأماكن خايسة ما تترقع (الخشم - بين الحواجب) اي ليييش !!


اخيس شي لما يكون مودج مو شي مالج خلق تلبسين وتهلقين آخر هلاقة والله مايبقى أحد بالكويت ماتشوفينه ههههههه لوكاشخة ماتلقين احد


اخيس شي لما تكونين توج مالجة وطالعة مع ريلج مطعم لبناني وتاكلين تبولة وتلصق بين الضروس !! واااااي والله يالفشلة اذا اشر وقالج اكو شي هني!! ودج تختفييين نصيحة ياللي توكم متزوجات حذااااري من التبولة وتوابعها ..


اخيس شي لما تنعزمين على عرس وايد قريب وحدج تشتطين ومايبقى مكياج ماشريتيه ولما تحطينه يطلع ابو الهوالة والجكر ولو عرس مالج خلقه ولا مستعدة حقه يطلع شكلج عجيب


اخيس شي لما تروحين الصالون وتسويلج تسريحة موعاجبتج وتجاملين تقولين ايييي حلوة على بو فشلانة !! وترجعين البيت تفلينها اي ليش التفلسف قولي لا موعاجبتني!! لا وتكون بالسعر الفلاني حرة صج


اخيس شي لما تكونين شارية بدلة وحاطتها بالكبت فترة ولما تيين عقب تلبسينها ماتسكر !! ههههههه وتقعدين تشفطين كل الهوا اللي بالدار الا تسكر ! اي لا تقصين على عمرج انت خايرته بالاكل وصايرة شمتنج ( عاد هذي صارت فيني بغيت ابجي وهونت ماني رايحه العرس بس تحسفت على المكياج جان اروح وما اتحرك !! لوول )


اخيس شي لما تكونين ذابحة عمرج بالرجيم وحارمة روحج من كل مالذ وطاب وتوقفين عقب اسبوع عالميزان والا متنحر ماتحرك!! والصدمة اذا زايدة كيلو @@


اخيس شي لما تشوفج وحدة وتقولج متناااانه !! اي سكتي منو سألج !! نحاسة الحريم ياتقولين شي حلو والا احتفظي برايج حق نفسج


اخيس شي لما تتصنعين اول الزواج جدام ريلج وقت الاكل يعني ذربة وماتاكلين كل الصحن وانت بتموتيييين يوع ومن يدش الدار فجيتي حلجج عاد ياكره اذا رد طلع ناسي شي هههههه لاتعليق على شكلج وانت مشفوحة راح ينصدم ..


اخيس شي لما تبين تجسين نبض ريلج وتقولين وااي احس اني سامنة شوية ودي ادش نادي وانت من داخلج ودج يقول لا ليش نادي شحلوج حياتي مافيج شي 00 بس اهو يقوولج اي دشي من ماسكج ..


اخيس شي وقت الخطبة لما تتصنعين وتنعمين الصوت بتموتين من النعومة والذرابة ويدق البيت فجأة واييج اخوج والا اختج الصغيرة وانت تصارخين اوووووووه منوووو شالحنة شتبووون !! قمة الدفاشة وهو عالخط يسمع


اخيس شي لما تكونين حدج كاشخة ورايحة استقبال وتوج ماخذة الجاي وتطيح منج الاستكانة! ومن الفشلة تقولين عادي ماكوشي وتكونين محترقة بالصج بس من الفشلة توزعين ابتسامات جنه عادي


اخيس شي لما يكون مودج ريلاكس وودج ترتاحين وتروحين سبا وتتسلط عليج وحدة قمة الدفاشة وحدها تعور لول وانت تقوليلها شوي شوي تقولج noooo u neeed this
يامن شراله من حلاله علة


اخيس شي لما يصير شعرج مدهن ومالج خلق تسبحين ولااازم تطلعين وماكو وقت !! <<< يذكرني بوحده قبل جم يوم :q


اخيس شي لما واحد يسألج جم عمرج وانت تقولين جم تحط علي ويعطيج عمر اكبر من عمرج الصجي @@ الصدمة وضيقة الخلق

هناك 12 تعليقًا:

  1. مشكوره مهندستنا
    بس هالشغلات مو كلها تصير حق البنات
    بعضها تصير حق الريال
    انا دائما هالشغلات تصير فيني مادري
    شهالنحاسه

    ردحذف
  2. هههههههههههههههه
    صحيح في أشياء تصير

    والتبولة مره صارت لي مع رفيجتي
    ولا قالت لي
    لما وصلت البيت وشفت يتلي البجية
    وقلت لها ليش ما تقولين تقول نحااسة :(

    ردحذف
  3. لووووووووول

    عبالي بس انا لمن ما يكون لي خلق اكشخ التقي كل الناس اللي اعرفها صج نحاسة لوووول

    يسلمو يا عسل عالبوست العسل

    ردحذف
  4. حد النحااااااسه..

    كل هالمواقف تسبب العساره..

    بس عجبني اصرارج بالروحه حتى لو ما تحركتي ..

    لووووووووووووووووووووووول من قلب

    ردحذف
  5. لووووووووول بوست عجيييب
    كل اللي قلتيه صح ,
    أهم شي سالفة الدلع والذرابه :×
    اح قويه
    مشكوره إنجينيرا

    ردحذف
  6. ولكم باك يالعيارة
    خرعتيني عليج بذاك البوست عبالي تقاعدتي من التدوين :))



    اما عن التبولة لحدث ولا حرج
    عاد انا غرامي تبولة ماقدر اقاومها باي مكان ودايما تصيرلي هالمواقف الخايسة ههههههههههه


    تحياتي عسولة ^_^

    ردحذف
  7. اخيس شي لما تشوفج وحدة وتقولج متنانة!!!

    اعرف وحدة كل ما تشوفني تقولي هالكلمة

    مو مو معقولة كل مرة اسمع عن المرة اللي قبلها وانا حتى وزني ما تغير

    ردحذف
  8. انا الصالون ماطلع منه الا وعاجبني شعري
    بس البلوة الميك اب
    لو قاعده بالبيت وفاضيه تلاقيني احط ميك اب زين مو بروفيشنال بس بالنسبه لي زينه
    بس ختصير حفله
    ايلاينر واي شدو فاتح وحمره قامجه يعني طالعه فيها


    بس صح على اللبس
    لما اكشخ مالقى احد
    بس خل البس عبايه واصير جني الكويت بالتسعينات
    مايظل زميله وصديقه ومن الاهل مالقاهم


    اما هذيل اللي يقولون متنانه
    وييع شتبون
    الواحد ينكمش بالبروده ويتمدد بالحراره انتو شكو
    لاوتلاقين جسمهم خاايس


    يسلمو عالبوست

    ردحذف
  9. لووول معظم اللي قلتيه صار لي لوووووووول بس هذي
    تعقدت منها
    7
    7

    ((اخيس شي لما واحد يسألج جم عمرج وانت تقولين جم تحط علي ويعطيج عمر اكبر من عمرج الصجي @@ الصدمة وضيقة الخلق))---->> =(

    احبــــــــــج

    ردحذف
  10. موضوع رائع ومدونة اروع خالص مودتي

    ردحذف
  11. بلوقج حده كيوووت :)

    والمواقف صج واقعية وغلبها مرينا فيها
    هههههههههه

    ردحذف
  12. تسلم ايدج على البوست الرووعة

    وايد حلو
    و تصير وايد شغلات مثل هاذي
    عيطج العافية

    ردحذف