بداية النهاية .. ام بداية الطريق

من زمان مو متحلطمه بالمدونه واليوم احتجت لها لان بخاطري تحلطم

يأس كأبه
كسل
خمول
عصبيه
توتر
ضياع
فــــــــــــــشــــــــــــــل

كل هالاحاسيس مرت علي قبل 5 شهور تحديدا شهر مارس .. حسيت ان مشواري الدراسي انتهى
حسيت ان خلاص لحد هني

STOP

انا بالمكان الغلط .. التخصص الغلط .. الجامعة الغلط
الخوف من مصارحة الاهل من زمان كان مسيطر علي وخلاني اسكت على امل ان الامور تتحسن
وصلت درجة الانفجار .. ما قمت اداوم وخليت مادتين FA
كلمة صديقتي تدرس بمصر
قلت لها سالفتي قالت لي لازم تكلمين اهلج وانا مستعده اسوي لج كل شي اذا تيين تدرسين عندي بمصر
فاتحة اختي بالموضوع كانت متفهمه بس كان الخوف من الوالد
خطيت الخطوه الثانيه وكلمة امي وكانت ردة فعل قويه غير متوقعه من امي
سببت لي احباط فوق الاحباط
صرت اداوم بالكلية غصبن علي .. بالمحاظره جسم حاضر و عقل شارد
خلصت الكورس وعدا على مادتين FA
وماده F ومادتين D+
انتهى الكورس مع الانذار الثاني لإنخفاض المعدل

حاولت و حاولت ان اقنع امي على الاقل عشان اقدر ابطل الموضوع مع الوالد بس ماكو فايده
فكرت بالتطبيقي هني بالكويت بس هم ما لقيت قبول من امي
حجتها اني ما ادرس عدل و لاهيه عن الدراسه
مو راضيه تقتنع ان انا مو حابه التخصص ( هندسه ميكانيكية ) و اذا مو حابه التخصص ما راح اقدر ادرس
سلمت امري لله و قلت اكمل لي الاخر
ماخذه مادتين بالكورس الصيفي احاول اعدل الوضع
والكورس الاول راح يكون تحديد حق مصيري
يا اشيل الانذار واشد حيلي او انفصـل

شعور محبط لما تحس انك على كف عفريت مو عارف شنو مصيرك بخصوص دراستك
عدم الاستقرار يقتل .. يعني انا بطريج مادري شنو اخر هالطريج .. ما احب احد يسألني عن دراستي ومن يسئلوني بسرعه اتنرفز لو حتى السؤال بسيط
السؤال الي يذبحني لي درجة البجي ( متى راح تتخرجين ؟ )

حاسه بكبت ابي انفجر لان اليوم سألوني هالسؤال
الصج صج انا مو عارفه اجابته
قررت اسلوب حياتي كله يتغير مع بداية الكورس
راح ادرس اول بأول
راح اشد حيلي
راح اكون اكثر سلاسه مع الناس
املي ضعيف بس راح اتمسك فيه
ادعـوا لي بالتوفيق

مواقف بنات !!

وصلني بالايميل واكتشفت وايد اشياء تصير فيني صج لوول

اخيس شي لما تكونين مخطوبة والا عندج مناسبة مهمة وتطلع بويهج نفرة لااا وتتسلط بأماكن خايسة ما تترقع (الخشم - بين الحواجب) اي ليييش !!

اخيس شي لما يكون مودج مو شي مالج خلق تلبسين وتهلقين آخر هلاقة والله مايبقى أحد بالكويت ماتشوفينه ههههههه لوكاشخة ماتلقين احد

اخيس شي لما تكونين توج مالجة وطالعة مع ريلج مطعم لبناني وتاكلين تبولة وتلصق بين الضروس !! واااااي والله يالفشلة اذا اشر وقالج اكو شي هني!! ودج تختفييين نصيحة ياللي توكم متزوجات حذااااري من التبولة وتوابعها ..

اخيس شي لما تنعزمين على عرس وايد قريب وحدج تشتطين ومايبقى مكياج ماشريتيه ولما تحطينه يطلع ابو الهوالة والجكر ولو عرس مالج خلقه ولا مستعدة حقه يطلع شكلج عجيب

اخيس شي لما تروحين الصالون وتسويلج تسريحة موعاجبتج وتجاملين تقولين ايييي حلوة على بو فشلانة !! وترجعين البيت تفلينها اي ليش التفلسف قولي لا موعاجبتني!! لا وتكون بالسعر الفلاني حرة صج

اخيس شي لما تكونين شارية بدلة وحاطتها بالكبت فترة ولما تيين عقب تلبسينها ماتسكر !! ههههههه وتقعدين تشفطين كل الهوا اللي بالدار الا تسكر ! اي لا تقصين على عمرج انت خايرته بالاكل وصايرة شمتنج ( عاد هذي صارت فيني بغيت ابجي وهونت ماني رايحه العرس بس تحسفت على المكياج جان اروح وما اتحرك !! لوول )

اخيس شي لما تكونين ذابحة عمرج بالرجيم وحارمة روحج من كل مالذ وطاب وتوقفين عقب اسبوع عالميزان والا متنحر ماتحرك!! والصدمة اذا زايدة كيلو @@

اخيس شي لما تشوفج وحدة وتقولج متناااانه !! اي سكتي منو سألج !! نحاسة الحريم ياتقولين شي حلو والا احتفظي برايج حق نفسج

اخيس شي لما تتصنعين اول الزواج جدام ريلج وقت الاكل يعني ذربة وماتاكلين كل الصحن وانت بتموتيييين يوع ومن يدش الدار فجيتي حلجج عاد ياكره اذا رد طلع ناسي شي هههههه لاتعليق على شكلج وانت مشفوحة راح ينصدم ..

اخيس شي لما تبين تجسين نبض ريلج وتقولين وااي احس اني سامنة شوية ودي ادش نادي وانت من داخلج ودج يقول لا ليش نادي شحلوج حياتي مافيج شي 00 بس اهو يقوولج اي دشي من ماسكج ..

اخيس شي وقت الخطبة لما تتصنعين وتنعمين الصوت بتموتين من النعومة والذرابة ويدق البيت فجأة واييج اخوج والا اختج الصغيرة وانت تصارخين اوووووووه منوووو شالحنة شتبووون !! قمة الدفاشة وهو عالخط يسمع

اخيس شي لما تكونين حدج كاشخة ورايحة استقبال وتوج ماخذة الجاي وتطيح منج الاستكانة! ومن الفشلة تقولين عادي ماكوشي وتكونين محترقة بالصج بس من الفشلة توزعين ابتسامات جنه عادي

اخيس شي لما يكون مودج ريلاكس وودج ترتاحين وتروحين سبا وتتسلط عليج وحدة قمة الدفاشة وحدها تعور لول وانت تقوليلها شوي شوي تقولج noooo u neeed this
يامن شراله من حلاله علة

اخيس شي لما يصير شعرج مدهن ومالج خلق تسبحين ولااازم تطلعين وماكو وقت !! <<< يذكرني بوحده قبل جم يوم :q

اخيس شي لما واحد يسألج جم عمرج وانت تقولين جم تحط علي ويعطيج عمر اكبر من عمرج الصجي @@ الصدمة وضيقة الخلق

BRB

قالوا سكت وقد خوصمت قلت لهم ..... إن الجواب لباب الشر مفتاح

والصمت عن جاهل أو أحمق شرف ..... وفيه أيضا لصون العرض إصلاح

أما ترى الأسد تخشى وهي صامتة ..... والكلب يخشى لعمري وهو نباح

___________

كن ساكنا في ذا الزمان بسيره ..... وعن الورى كن راهبا في ديره

واغسل يديك من الزمان وأهله ..... واحذر مودتهم تنل من خيره

إني اطلعت فلم أجد لي صاحبا ..... أصحبه في الدهر ولا في غيره

فتركت أسفلهم لكثرة شره ..... وتركت أعلاهم لقلة خيره

ضـريره

قصيده مؤثره قريتها لنزار قباني !!

قالت لهُ

...أتحبني وأنا ضريرة ...

وفي الدُّنيا بناتُ كثيرة ...

الحلوةُ و الجميلةُ و المثيرة

...ما أنت إلا بمجنون ...

أو مشفقٌ على عمياء العيون ...

قالَ ...

بل أنا عاشقٌ يا حلوتي ...

ولا أتمنى من دنيتي ...

إلا أن تصيري زوجتي ...

وقد رزقني الله المال ...

وما أظنُّ الشفاء مٌحال ...

قالت ...

إن أعدتّ إليّ بصري ...

سأرضى بكَ يا قدري ...

وسأقضي معك عمري ...

لكن ..

من يعطيني عينيه ...

وأيُّ ليلِ يبقى لديه...

وفي يومٍ جاءها مُسرِعا ...

أبشري قد وجدّتُ المُتبرِّعا ...

وستبصرين ما خلق اللهُ وأبدعا ...

وستوفين بوعدكِ لي ...

وتكونين زوجةً لي ...

ويوم فتحت أعيُنها ...

كان واقفاَ يمسُك يدها ...

رأتهُ ...

فدوت صرختُها ...

أأنت أيضاً أعمى؟!!...

وبكت حظها الشُؤمَ ...

لا تحزني يا حبيبتي ..

ستكونين عيوني و دليلتي ...

فمتى تصيرين زوجتي ...

قالت ...

أأنا أتزوّجُ ضريرا ...

وقد أصبحتُ اليومَ بصيرا ...

فبكى ...

وقال سامحيني ...من أنا لتتزوّجيني ...

ولكن ...قبل أن تترُكيني ...

أريدُ منكِ أن تعديني ...

أن تعتني جيداً بعيوني ...

--------------------------------

اخ تعور القلب والله .. هذا جزاء الاحسان !

مجاول ( م.أ ) و ( م.ج )

السلام عليكم .. ومساء الخير عليكم

وانا احوس بالتلفزيون اليوم الظهر مريت على القناة الفاضله

ســــــــكــــــــــــــــــــــوب

قناة ترفع الضغط و تبط جبدي ومن اشوفها احس الكويت مو بخير

احس الكويت كلها مشاكل .. احس احنا شعب مظلوم

اوكي مواضيعهم فيها شي من الواقع بس اوفر يعني

لوعو جبدي فيها .. المشكله عندي بالبيت الي يحبونها ولا جان انا حاذفتها

المهم خل أكمل وانا احوس ولا مقابله مع

الديج الاول : م.ج و الديج الثاني : م.أ

والنعم فيهم ناشطين سياسيين بديرتنا ;q

كانت مناظره عاديه وفجأه تحولت حق شي ثاني .. اتوقع يسمونه " مجاول "

المناظره كانت عن " الفرعيات "

بس المجاول صار " حضر وبدو وقبايل و منو عيال بطنها "

واحد يصارخ م.أ والثاني م.ج يسد اذونه ويجابل الطوفه يقول اكلم الديكور احسن

لوووول من صجكهم هذي عقليات سياسيين ؟

ولي يقول حق الثاني ناهق على كيفك .. و و و

م.أ : انت يا م.ج ماتروح مسايد ولا عمرك طبيت مسيد !!

م.أ : مجلس الوزراء يشرفهم يجتمعون معاي !!!

م.أ : انا اشرفك و اشرف وزير الداخليه معاك !!

م.ج : اتشرف اكبر شنب ؟؟ ( ضحكني لان قاعد يحاول ايره بالحجي .. على مين تلعبها انا جاكتك )

م.ج : طلع المصحف من جيبه وقال احلف على المصحب ما عندك ازدواجيه

طبعا والمسجات الي تحت مو صج .. جنازه وشبعو فيها لطم

وبعد الطق والمطاقق و بعد ما تعادلو الديج الاول والثاني

وخروهم عن بعض خافو تصير خساير اكثر بالاستيديو

المذيع أحمد الفضلي: يجب علينا كلنا كمجتمع واحد ان نحافظ على وحدتنا الوطنية ( خخخخ مش كنت تؤول كدا من الاول )

الحمدلله والشكر على العقليات الي عندنا .. كانت مسرحيه تضحك

استمتعت فيها :q

نعم يعني ؟!

صباح الخير والنور والنوير

توني قاعده من النوم من عقب يوم كان حافل و متعب

كان عندي امتحان الصبح رحت الكليه وامتحنت و الحمدلله الامور تمام

رديت البيت الظهر جان تحن على اختي اروح معاها عرس

قولبت الفكره براسي جان اقول خل اروح منها طماشه ومنها نقدر البنت

لانها ما قصرت معانا بعرس اختي ;q

ورحت و وتزهبت وكل شي تمام ورحنا العرس والحمدلله

العرس كان حلو واستانست

الله يوفج المعاريس

ويزوج العوانس ;q

الحجي الحين يايكم ..

عقب هالوناسه و الاناسه و التعب من الصبح قاعده

ردينا البيت جيكت على موبايلي ولا اشوف شي صدمني

مسج !!

طبعا شي طبيعي اي احد اييله مسج .. بس الي داز لي المسج !!

ليش يعني ؟ و شلي طرا ؟ شو عدا ما بدا على قولة اشقاءنا السوريين ؟

هالمسج من وحده اقدر اقول كانت اكثر من اخت

اهي بنت خالي وبنت عمتي بنفس الوقت !!

وصديقتي و اسرارنا كانت مع بعض .. يعني علاقه وايد حلوه

بس علاقتي فيها انتهت قبل سنه ونص بحكم منها بدون مناقشه !! صدقت كلام ناس فيني

قالو انا قلت .... وقلت .... و قلت ... عنها

ما عطتني فرصه المواجهه ! مع اني وصلت لي البيت قعدت فوق وامتنعت تنزل لي !

و نقلت الحجي وقالت وقالت لين تقريبا 99% من الاهل صارو بصفها

انقطعت علاقتي فيهم كلهم من سنه ونص

انغثوا شلون قدرت اسفهم كلهمم !! قامو يدورون الزلات على خواتي الثانين لين قطعو اهم بعد

واخيرا امي ما قدرت تستحمل الي صار وما قامت تروح لهم وانقطعنا كلنا عنهم

طبعا ما نروح بس نمر ساعات على يدتي لما يكون البيت فاضي نسلم

المسج كان

السلام عليكم .. بسم الله الرحمن الرحيم ( فهل عسيتم إن توليتم أن تفسدوا في الأرض وتقطعوا أرحامكم أولئك الذين لعنهم الله فأصمهم وأعمى أبصارهم) .. صدق الله العظيم

فلانه مهما كان احنا اهل مالا داعي الغريب يتكلم عنه و يقولون بيت فلان صار فيه وفيه .. ويدتي تعبانه كل خميس بيمعتنا تبجي .. علشانها تعالو الخميس الياي باليمعه اذا على الحجي الي صار انا مسامحتج و بقلبي كلام وايد ما ينفع بمسج ياليت اذا فاضيه دقي لي

هذا كان المسج :\

بالبدايه حسيت بشعور غريب طبعا الرقم انا ماسحته من موبايلي بس حافظته بقلبي

راويت امي المسج وخواتي وطول الليل نسولف ليش و شالسالفه ؟

شمعنا الحين تذكرونا ؟ اكيد خلصو مالقو احد بعد يتهاوشون معاه قالو نرد نبطل دفترهم

مع العلم امي ما قطعت عنهم الا قبل شهرين !!

طبعا حقرت وما رديت على المسج ولا دقيت ولا راح ارد اذا اهي دقت .. اهم شي انها تقول مسامحتج يعني لي الحين مو مقتنعه اني مظلومه بالي صار لووول شر البليه ما يضحك

الي شفته منهم بسنه شي ما له غفاريه .. لو انا غريبه ما قالو وسوو جذي معاي

على قولة اختي لا يكون اخوها بينزل بالانخابات و قاعده تيمع اصوات :\

حقيقتاً عكرت صفو مزاجي امس

الله كريم .. وباب اييك منه الريح سده واستريح ;q

طبعا تحلطمت بالمدونه لان مكان تحلطمي :\

-----------------------------------------------------------

صدقت بلي حكى لك ورحت ابد عني .. ما ضني تنسى عقب فرقاك وغيابك

ما اقول الا قـــــــــســـــــم بـــالله ظالمني .. الله حـسيبك يجي لك يوم بحسابك

سَلِمَ فاهُكْ

شكرا يا بابا صباح ..

الحكمه في اختياراته و قراراته

هالشي متعودينه منه

وصولنا هالمرحله شي يضيق الخلق ويحز بالخاطر .. بس الله كريم

وان شالله يسمعون ويستفيدون من كلامه

هذي الخطوه الاولى نحو التغيير .. بس هل احنا راح نتغير بإختياراتنه القادمه ؟

بلا مجلس بلا بطيخ

اول مره اكتب بوست يتعلق بالسياسه .. انا اكره شي اسمه سياسه بس اليوم مخي سياسي صاير

يمكن لان اليوم وايد تمعنت بالوضع الي نمر فيه و اوضاع الديره الي يرثى لها

الــــمــجـــــلـــــــــــــــــــــــــــــــــــــــــــــــــس

لاحظت ان وايد ناس خايفين من الحل و ان الحل راح يدهور الاوضاع اكثر ما اهي عليه

وانا احوس في المدونات بعد شفت ناس تتذمر من الحل

ومو عاجبها .. بالعكس انا شايفه ان الحل بمحله و وااايد مناسب

وقريت مقاله حق الصحفي علي الذايدي

كان يتكلم عن فوائد الحل

1 _ رواتب أعضاء مجلس الأمة تستهلك بندا كبيرا من ميزانية الدولة , ولا ينفك أعضاء مجلس الأمة يطالبون بزيادتها كلما سنحت لهم الفرصة,مع أنهم لا يستحقونها فاغلبهم لا يحضر الجلسات وخاصة الجلسات المهمة , فيغادرون الجلسة فورا بمجرد أن تبدأ لغة العيون بينهم وبين بعض الرموزالحكومية .

( منشار طالع واكل نازل واكل ) ... بنوفر معاشاتهم

2_ سوف يتم إلغاء بند تعديل الوضع الذي يمنح لأعضاء مجلس الأمة المنتخبين سواء كانت مبالغ مادية أو سيارات فارهة أو تلفونات نقالة,مما سوف ينقل تكاليف هذه البنود المكلفة لخزينة الدولة .

طايحه ببطونهم وعلى افانه :\

3 _ سوف يتم إلغاء ما يسمي بالوفود البرلمانية والتي تجاوزت ميزانيتها في العام 2005 المليار دولارمن خزينة الدولة, والتي تشوبها العديد من الشبهات مثل اختيار أعضاء هذه الوفود من أعضاء مجلس الأمة لأقاربهم والمحسوبين عليهم للسفر وصرف بدلات مالية يومية لهم بالإضافة لما يصرف علي عضو مجلس الأمة نفسه,ثم ترجع الوفود للكويت مرددين الديباجة المعروفة مسبقا وهي(أن الرحلة حققت أهدافها المنشودة )

بذمتكم شنو الاهداف الي حققوها ؟ وسبحان الله ما تصير هالرحلات الا بالصيف وبالكوادور والمالديف والذي منه :q

4_ لن يكون هناك حصانة لأحد علي أحد,فلا يمكن لشخص مثل النائب السابق السيد القلاف أن ينزل من سيارته ليصفع أحد المواطنين ثم يعود ليركب سيارته مجددا من غير أن يكلمه أحد بحجة أن لديه حصانة برلمانية.

لوووووول يعجبني استخدامه للحصانه .. عطوني الحصانه واكوفنهم كلهم ( الا من رحم الله منهم )

5_ لن يكون هناك صراع بين أبناء القبائل من أجل الترشح للبرلمان ولن تكون هناك انتخابات فرعية ينتج عنها العديد من المشاكل الاجتماعية والخصومات بين أبناء البيت الواحد أحيانا بسبب حق الترشيح , فعندما يختفي مجلس الأمة سوف تختفي معه الأحقاد والضغائن التي زرعتها الانتخابات بين أبناء العمومة وتعود اللحمة والترابط بين الناس وسوف تسود المحبة والألفة بينهم.

يعني ماكو فرعيات ومداهمات لهم وقنبله دخانيه خنقت عيوز فبيت ييران الي مسوي فرعيه .. هم فايده حلوه !

6_ عندما يطلب الموظفون في الدوائر الرسمية من أحد المراجعين أن يلتزم بالدور لن نسمع أحد يردد مقولة "أنا أخوي عضو مجلس أمة,راح أشرشحكم" أو مقولة"أنا أبوي عضو مجلس أمة,راح أستجوب وزيركم"وعندها سوف يلتزم الجميع بالدور ولن يتم تمرير معاملات خاصة بحجة أنها تابعة للعضو الفلاني أو غيره.

يعني كلكم سواسيه مفيش حد احسن من حد ياخويه

7_ سوف يختفي المسلسل المكسيكي الطويل المسمي بالعلاج بالخارج , ولن يتم التوسط لأحد من أجل السفر السياحي بحجة العلاج لأنه عندما لن تكون هناك انتخابات لن يكون هناك مرشحين نافذين يتوسطون لأحد من أجل العلاج بالخارج لكي يحصلوا علي أصوات عديدة محسوبة عليه,وعندها لن يسافر للخارج إلا من تري إدارة العلاج بالخارج مدي استحقاقه لهذا الطلب,فقد وصلت طلبات العلاج بالخارج في هذا العام فقط إلي 76 ألف طلب فكيف بالله عليكم سنتمكن من إدارة شؤون البلد وكلنا مرضي أو مرافقين للمرضي.

ايه والله عاد هذي وايد تصير وللاسف وحده تصير لي راحت تعالج عيونها على حساب الحكومه وواسطتها احد النواب الافاضل

مسكينه نظرها كان سته على سبعه :q

يعني بذمتكم احنا ننتخبهم ونوصلهم لي المجلس ليش ؟ عشان يستفيدون من كل هالامور واحنا ننعل :\

برلمان منتخب منا احنا الشعب و يشكل عبئ علينا

صايرين تحت رحمتهم لان اغلب معاملات الديره صايره ما تمشي الا بتوقيع من عضو و تعال عرض ويهك عند فلان وعلان عشان يوصل معاملتك حق العضو الفلاني يمشيها لك .. مو القصد تبي واسطه لا بس لان ما تمشي المعامله قبل لا يتكرم و يوافق عليها العضو الفاضل الي ما شاف النعمه الا من دش المجلس

يحاربون الفساد بالديره و اهم اساس الفساد بالديره

المشكله احنا الي نوصلهم لي المجلس .. يعني يامن شرا له من حلاله عله

يلا الحل قريب ان شالله .. وجان زين ماكو مجلس بس ما يصير للاسف

ان شالله اختياراتنه تكون احسن المره اليايه ولو اني ادري

لا حياة لمن تنادي

ونعم الدكاتره !!

قصة وحده من رفيجاتي وايد معوره قلبي

صارت لها سالفه خلال هالشهر غيرت منها وايد

نفسيتها ..

تصرفاتها ..

تعاملها مع الناس ..

البنت صارلها خمس شهور متزوجه ومن عقب عرسها واهي مو مترقعه

من فتره كانت تشكي من ايدها .. كانت تحس بتخدير بإيدها وكنا نقول لها روحي الطبيب لا تطنشين

راحت المستشفى و سوت اشعه و الفحوصات الازمه

قالها الدكتور مافيج شي وهذا كلا شد عضلات من رقبتج لي ايدج اليمين

وعطاها حبوب و قالها دهني رقبتج بفكس وكل شي تمام ان شالله .. وفعلا تحسنت حالتها وراح التخدير

قبل شهر .. قعدت من النوم ما تشوف شي بعينها اليمين .. اخترعت بس دائما ترفض تروح المستشفى

اجبروها اهلها تروح المستشفى و راحت مستشفى البحر

شوفو الدكاتره ومعاملتهم

فحص عينها الدكتور وكان نظرها بعينها اليمين صفر على عشرين و قال لها انتي لازم تاخذين لج دريب كورتيزون بدون لا يشرح لها شسالفه ( كان دكتور خفاره ويبي يخلص شغله بس ) .. اهي ما تدري شنو يعني كورتيزون قالت اوكي وكان معاها اخوها هم ما يدري قال لها الدكتور 3 ساعات على ما يخلص الدريب ..

مرت 3 ساعات وصارت الساعه 12 بليل .. شالو الدريب واهي مو حاسه بتحسن بعينها

قامت بتطلع .. قالت لها السستر لا انتي وين رايحه ؟ الدكتور مسجل لج دخول انتي لازم تنامين هني

البنت انصدمت و عصبت قالت مو بكيفكم الدكتور حتى ما قال شفيني

بعد صراخ وهواش معاهم قالو حق اخوها توقع على تعهد اذا طلعتو من المستشفى وصار لها شي احنا نخلي المسؤوليه منها

خاف اخوها و اقنعها انها تنام هناك عشان تاخذ كورس الكورتيزون كامل ..

نامت بالمستشفى .. وثاني يوم اشتغلو عليها فحوصات و مليون دكتور دش عليها و قالو لها لازم نسوي لج اشعه مغناطيسيه

ثالث يوم دش عليها الدكتور وقال لها .. انتي مؤمنه وتامنين بقضاء الله وقدره و توج صغيره وقويه

جنه يبي يزف لها خبر وفاة واحد من اهلها واهي خايفه ماتدري شسالفه

قال لها انتي فيج مرض (MS ) .. الي اهو تصلب الاعصاب .. الله يبعدكم عنه

طبعا هالمرض مو زين و انتكاساته وايد جايده .. انصدمت البنت بس بالنهايه قالت الحمدلله على كل حال

قال لها الدكتور .. انتي متزوجه بس لا تفكرين انج تيبيين عيال لان الكورتيزون يشوه الجنين

كلام الدكتور قتلها .. بنت توها متزوجه بكلامه الي كلا تشاؤم و تحطيم للنفسيه قتل ابسط شي ممكن تفكر البنت فيه (الامومه )

قعدت بالمستشفى اربع ايام تاخذ دريب كورتيزون .. وصار نظرها 4 على 20

وعطاها حبوب قال لها تاخذين 12 حبه باليوم .. يعني البنت حست روحها راح اتم عايشه بس عشان تاخذ علاج لان هالمرض ماله علاج

طلعت من المستشفى الدنيا كلها سواد بعينها .. غصب تبتسم و غصب تشارك الناس بسوالفهم

اسمعت عن دكتور بالبحرين يعالج الام اس بدون كورتيزون .. وانا من الناس الي مدحته لها دكتور ينقال له الشافعي

حجزت البحرين مع امها وريلها وراحت له ومعاها كل الفحوصات

قعدت و شرحت حالتها للدكتور هناك و طبعا ما رضى يشوف الفحوصات الي مسويتها بالكويت

سوا لها فحوصات اهو و طلعت النتيجه !!

قال لها انتي متأكده قالج الدكتور ان إم اس ؟ و بعدت تفحص وتمعن قالها .. حرام الي سواه فيج الدكتور !!

انتي مافيج إم إس .. انتي عندج عدم تساوي بالشحنات الكهربائيه ( انا عن نفسي مو فاهمه وايد )

قال لها انتي علاجج حبوب و تبتعدين عن التلفزيون و الموبايل واللاب توب فتره على ما تتسوى الشحنات الكهربائيه

انتي ماااااااااااااااااااااا فيج MS

قال لها عطيني فحوصاتج الي سويتها بالكويت .. قراها وقال انتي كاتبين لج احتمال إم إس بس مو متأكدين و قاعد يعطيج كورتيزون و علاج الام اس .. " احتياط " او وقايه !!

يا سلام يا دكاترتنا .. يا سلام عليكم

طبعا الكورتيزون اثاره الجانبيه

ارتفاع ضغط العين و مرض السّاد ( الكاتاراكت ) وهو عتامة عدسة العين
ارتفاع مستوى السكر في الدم
مرض الرثية ( الروماتزم )
تخفيض المناعة
استدارة الوجه و تجمع الدهون بين الرقبة والأكتاف ( حدبة )
زيادة العطش والتبول
آلام في العضلات
حجز عنصر الصوديوم داخل الجسم مما يؤدي إلى زيادة السوائل وتنشأ الوذمة (الاديما) ويرتفع ضغط الدم فيزيد العبء على القلب
يطرد عنصر البوتاسيوم مع البول مما يؤدي إلى فشل عمل القلب
تسبب اضطراب الدورة الشهرية
تسبب تقليل المناعة مما يؤدي إلى تأخر التئام الجروح والتجرثم البكتيري والفيروسي والفطري وغير ذلك فيصاب المريض بمرض آخر دون أن يشعر لان الكورتيزون يخفى أعراض التجرثم
يؤدي إلى ترقق الجلد وظهور الشعيرات الدموية
يغير البيئة البكتيرية على سطح الجلد مما يؤدي إلى نمو جراثيم ضارة كالفطريات

والله حرام الي سويتوه بالبنت بس الحمدلله على كل حال

الحين البنت نفسيتها ارتاحت و سلمت امرها والي صار فيها لربها ياخذ حقها منهم

كان شهر بالنسبه لنا .. بس بالنسبه لها هالشهر سنين

.. طبعا عطاها علاجها الشافعي وقال لها للاسف انا انصحج لمدة سنتين ما تحملين خوفا على الجنين

حرموها فكرة الحمال لمدة سنتين والسبب شنو ؟

خطأ طبي !

جف الكلام !!

جـــف الـكـــلام و ما بقى للعـــطا ريــق

بـخــلت يـديــن العـــــــاطفه وانتهيــــــنا

مــــــجـروح بــــعضي مـنـتهي مــــــيت بــــضـيـق

لا جـــــو يــــــصـفا لــي ولا شــــــــط مـــــــيـــنا

مـــــدري كــذا حـــظي او انــه تــوافـــــــيــق

كـــل مـــا نــســينا هــــــم ... هــــمٍـ يــجــينا

يــــمــــوت فـــيــــني جــــرح والاخـــــر يــفـــيق

يـــــــاربي لـــيــه أحـــبابــــــنا مــا تــبــــيـــنا !!

طــــبطبت قــــهـر الـــعــاصفه يـمــكن يــلـيــق

لـــكـــن غــــوانـــــا هـالــفــراق وبـــــــكــيـــنا

صـــــــــبّرت شـــــوقي عـــل بـالصبر بــــــيطيق

سـألــــت هــمي .. قــــال هـمي: نـــســـينا...!!

حــــــلمـــي نــــــهـار وحــــلم غـــيــري طــواريــــق

والــــــمـــشـــكـله مــلــيــــون فـــيـــنا...وفــــيــنا..!!

حزيـــنه

الفراق

حروف قرأتها في احد المنتديات فاحببت أحبتي ان تشاركوني بها

الفراق ... حزن كلهيب الشمس يبخر الذكريات من القلب ليسمو بها الى عليائها فتجيبه العيون بنثر مائها .. لتطفيء لهيب الذكريات ..

الفراق ... نار ليس للهبه حدود .. لايحسه إلا من اكتوى بناره..الفراق ... لسانه الدموع .. وحديثه الصمت .. ونظره يجوب السماء ..

الفراق ..هو القاتل الصامت .. والقاهر المييت .. والجرح الذي لا يبرأ .. والداء الحامل لدوائه ..الفراق ...كا الحب تعجز الحروف عن وصفه وإن أبينى تفرقا..

الفراق .. كالعين الجاريه التي بعد ما أخضر محيطها نضبت ...عند الفراق .. إجعل لعينيك الكلام فسيقرأ من احبك سوادها .. وإجعل وداعك لوحة من المشاعر يستميت الفنانون لرسمها ولايستطيعون ... فهذا أخر ما سيسجله الزمن في رصيدكما ..

وبعد الفراق ....لا تنتظر بزوغ القمر لتشكوا له الم البُعاد .. لانه سيغيب ليرمي ما حمله ويعود لنا قمراً جديد ..ولا تقف امام البحر لتهيج امواجه وتزيد علىما ئه من دموعك لانه سيرمي بهمك في قاع ليس له قرار ويعود لنا بحر هادئ من جديد ..وهذي هي سنة الكون....... يوم يحملك ويوم تحمله .......

وانت .. ماذا عنك انت لم تحمل الايام كلها .. لم تقف مكانك بلا حراك تندب الاطلال و تبللك الدموع وتتقاذفك الآلآم ويأكل منك الندم وتضرب الاكف بلحن الاهات على مافات .. فهل ستعيد ماكان.. لا .. إنك لن ترد النهر الى مصبه .. والشمس الى مطلعها ... بل ستكون كمن يطحن الطحين وهو مطحون .. وينشر نشارة الخشب ...و ستردد كان يا ما كان .. ..

لم لاترخي ستارالامل.. وتودع الماضي بلا أمل للعوده .. لم لا تكون كالقمر او مثل البحر .. تلقي بهمك لاتلقي له بالاً .. فتعود لترى كيف تعزف الايام لحنها على نغمات مستقبلاً واعد .... فإن كنت فارقت حبيباً لاتظن انه سيعوض .. فالكل يرى حبيبه مثل ما أنت تراه .. فالدنيا وإن خلت من الاحباب بعينك.. فهي بالبصيرة مليئه .. فبحث مثل بحثك مسبقاً وستجد من يوازي حبيبك اويربوا عليه ..

فلا تقف عند حداً والحياة بلا حدود .. الكل يسعى وانت مكبلاً نفسك بالقيود .. فتسعد غيرك وانت شاقي وتضحك من حولك وانت باكي ..فتكون ممن قال فيهم الشاعر :

وأسعدت الكثير وانت تشقى * وأضحكت الانام وانت تبكي

فإذا اصبحت عش تحت شمس يومك ولا تلتفت لأمسك لأنه قد خيم عليه الظلام .. وفكر بيومك وغدك .. وإذا امسيت عش تحت ضوء قمر ليلتك ولا تلتفت لشمس نهارك لانها رحلت وحل محلها الظلام ..

الغيره سبايب

الغيره هي غريزه فطريه موجوده داخل كل انسان
حالها حال أي صفه ثانيه .. فما نقدر نقول انا شخص ما اغار
لان جذي نقص على نفسنا و نحاول نقنع نفسنا ان احنا مجردين من هالصفه

طبعا اكو اشخاص الغيره عندهم تكون معقوله
واهم الي اصلا ما تبين عليهم بوادر الغيره
واكو ناس تتعدى الغيره عندهم حدود اللا معقول
وتصير الغيره واضحه من تصرفاتهم وحركاتهم

والغيره انواع وايد .. في غيره زميل من زميله سواء كان بالعمل ولا الدراسه
غيرت بنت من رفيجتها .. غيرت ريال من رفيجه
للاسف هالايام بعد نشوف غيرت اخو من اخوه
او اخت من اختها
وهالموضوع وايد حساس بالنسبه لي بس مابي اتكلم فيه

بتكلم عن غيرت الحبايب والزوج على زوجته

بهالحاله الغيره شعور مثله مثل وايد من المشاعر والاحاسيس
بس هالشعور يتحول الى شعورمؤلم اذا تعدى وزاد عن حده
وايد نشوف مشاكل بين الزوج و زوجته و الحبايب بسبب هالغيره
واحيان توصل الى حد الشك والظن والحرمان ..

وانا احوس مريت على مدونة الاخت TRUTH
وقريت عندها سالفة الريال الي طلق مرته وكان السبب
انها ما عطته يشوف الموبايل لما طلب ان يشوفه

بهالحاله الغيره بين الريال ومرته زادت عن حدها ووصلت لي حد الشك
وكان سبب الطلاق اكيد اهو الشك مو الغيره

حلو أن يشعرنا من نحبه انه يغار علينا ولكن هالشيء الجميل سيصبح مدمرا إذا لم نتعقل بما نقوم به من أفعال

ومن اروع الكلمات الي قريتها عن هالموضوع

عندما تغار المرأة .. تبكي
وعندما يغار الرجل .. يصمت



عندما تغار المرأة
تكره الرجل
وعندما يغار الرجل
يكره نفسه !




أحياناً ..
يغار الرجل على امرأة تحبه
حتى لو لم يكن يحبها
وتغار المرأة على رجل يحبها حتى لو لم تكن تحبه !


أجمل أنواع الغيرة
غيرة الحب ..
وأسوأ أنواع الغيرة
غيرة الحقد ( الله يكفيكم شرها )


من بوادر الغيرة
اشتعال المرأة
وانطفاء الرجل !



تسعد المرأة
بغيرة الرجل الذي تحبه
وتختنق
بغيرة الرجل الذي يحبها ولا تحبه!

نحن ..
نغار على الذين نحبهم
لأننا نحبهم
ونغار على الذين يحبوننا
لأننا نحب أنفسنا !


لا تعبر عن حبك لهم
بالغيرة ..
إذا كنت غير متأكد
من إحساسهم تجاهك
فقد تكشف لحظات ضعفك
لمن لا يستحق!



ما أكبر الفرق بين الحب والغيرة ..
فالحب الكبير يولد الغيرة .
والغيرة الشديدة تقتل الحب



وما أعظم الفرق
بين الغيرة والشك..
ومعظم حالات الغيرة في الحكايات العاطفية
يكون مصدرها .. الشك !
إذا ضبطت نفسك متلبساً
بالغيرة "على " إنسان ما
فتفقد أحاسيسك جيداً
فقد تكون في حالة " حب "
وأنت "لا تعلم"..


بالنهايه

ليش تنقلب الغيرة أحياناً إلى شك ؟؟

ليش تكون الغيرة زايده عند البعض ؟؟ الغيره بسبب إنعدام الثقه أم ماذا ؟؟

ليش تنقلب الغيرة في الغالب إلى مشاكل ؟؟

شنو تعريف الغيره بالنسبه لك ؟

واذا في بدليات بالموضوع بتطوفونها ؟

ضـاقت عـلـيك !!

ضاقت عليك وما لقيت الا انا تقول وش رايك في محبوبي الجديد

تبغى تعنيني وانا ناقص عنا ؟ اموت واعرف بس انا وش تستفيد





مستكثر اني عشت بعدك في هنا ولا سمعت و ضايقك اني سعيد

احس لما قلتها لي مــوتي دنى و دقات قلبي وقتها قامت تزيــــــــــد





حاولت اجرب وانهي اللي بيننا اثر العواطف راسها دايم عنيد

انا على حطت يدك هذا انا اكذب عليك ان قلت لك فرقاك عيد

( المقطع الاخير ياخذني عالم ثاني )


----------------

الاغنيه روعه ... ومو غريب على نوال الفن الراقي هذا
موضوع الاغنيه او قصتها بالنسبه لي !!
نووووووو كومنت
الله يعين الي يمر بهالموقف
وسمعوها صج عجيبه :)

قصة نجاح

يوم الخميس 29 يناير الساعه 8 الصبح

كانت الاميره نايمه جان يدق التلفون تررن تررن .. تررن تررن

للامانه كان مسج مو اتصال والنغمه كانت .. تن تتن تتن تن تن تن تن ( مالت زين الي هبو فيها برمضان )

مسج ( قـومي ترا طلعت قريدات الثيرمو )

جان تطير النومه من عين الاميره وتدق تلفون على رفيجتها

الاميره : اشلونج شخبارج .. الخ الخ .. بشريييييييييي جم طلعتي

دلول : تمام الله يسلمج .. الخ الخ .. الحمدلله طلعت من الماده نااااااجحه طلعت D

الاميره : مبرووك .. انزين انا جم قولي قلبي طاح

دلول : مادري والله خذيت قريدي و من الوناسه مشيت ما شفت انتي جم

اهني ويه الاميره قام يقط الوااان و الاسلوب كان يخرع

تقول بقلبها ( الحين دلول اكبر ملقوفه مرت علي بحياتي معقوله ما جيكت انا جم ؟ )

الاميره : انزين شوفي انا جم بسرعه

دلول : انا طلعت الحين من الكليه سوري والله

الاميره : مشكوره انج بلغتيني ( اي هين طلعتي ) .. مع السلامه

حست الاميره ان اكو شي غلط وما تبي تتكلم دلول

قامت بدلت ملابسها و بدوووون ريوق على طول السياره وررررر الكليه

الطريج عادتا خمس دقايق ذاك اليوم ما خذا منها دقيقتين

وصلت القسم و عند غرفة الدكتور النتائج

تقرا تقرا وصلت عند رقمها الجامعي بطلت عينها وقلبها يدق شافت

F

الدموع ترست عينها .. صدمه ما بعدها صدمه لان اساسا الماده من قبل ماخذه فيها F وهذي ثاني مره تعيدها

دشت على الدكتور

يا دكتور شلون جذي انا درجاتي زينه بالميد تيرمات .. يعني لو حتى قريدي مو زين بس مو F

الدكتور : والله هذي درجاتج وانا ساعدتكم كلكم

الاميره : انزين انا جم يايبه بالفانيل ؟

طلع الدكتور الامتحانات يبي يطلع امتحانها .. يدور يدور يدور طلعها وسرح فيها

الدكتور : اوه انا مو مصلح ورقتج وراصد الدرجات بدون الفاينل

الاميره : !!!!!!!!!!

الدكتور : اعذريني والله الظاهر راحت بين الاوراق وانا اصلح .. روحي وتعالي بعد ساعه اكون مغير كل شي

اهني الاميره ما تدري تبجي من الفرح ولا من القهر ولا شنو !!

لخبطة مشاعر ما بعدها لخبطه

وساعه كامله تحوس بالقسم واهي تدعي وتدعي

ردت عقب ساعه ولا مصلح الامتحان وكل شي تمام

الدكتور : مبروك D+

الاميره : الله يبارك فيك دكتور ومشكور وما تقصر ( لو مو الفشله جان لمته من الوناسه _توووووبه اخذ عندك ماده بعد طلعت روحنا طول الكورس )

النجاح بهالماده يسوى النجاح ببجاي المواد كلهم

ومن الفرحه والوناسه قررت تسوي نيو لوك الاميره :q

صج الله لا يحطكم بهالموقف

خلوه مع نفسي

السلام عليكم

امس بليل ويا كرهي لليل من كثر ما افكر فيه

اختليت بنفسي و كنت افكر بحياتي والاشياء الغلط

الي فيها ويا كثر الاغلاط بحياتي
ييت احل مشكله بيني وبين عقلي وقلبي
يمعتهم و وقعدنا نسولف وصار هالنقاش

انا : افتتحت النقاش بكلمه وحده " الفراق "
عقلي : اخيرا فكرتي صح !! هذا الي كان لازم يصير من زمان شفيج يا بنيه اصحي
قلبي : انتي من صجج ؟؟ انتي تدرين شقاعد تقولين ؟
عقلي : اذا هالخطوه تمت اعرفي انج اول مره تسوين شي فيه خير
قلبي : وانا ؟ ما فكرتي فيني ! منو الي يحسسني بالامان ؟ ومنو الي استند عليه وقت الشده ؟
عقلي : بسج انانيه يا بنيه .. كافي انانيه .. طول عمرج تفكرين بروحج وبس ما تفكرين بالناس
قلبي : حق منو انبض ؟ حق منو اشتاق ؟ منو يسمعني اذا بجيت و منو يساعدني اذا تعبت ؟
عقلي : يا بنيه .. انتي تدرين انج قاعده تظلمين ناس بأول حياتهم كافي عاد
قلبي : انتي مو قاعد تظلمين احد الزمن ظلمهم وظلمج معاهم
عقلي : حطي نفسج مكانها .. ترضين يصير فيج الي الحين انتي السبب بلي يصير فيها ؟
قلبي : ما عليج دام تحبينا و يحبج وراح تزوج وخلاج لج حق عليه مجبور يوفيه
عقلي : انتي ما تفهمين ؟ متى الزمن يعلمج ؟ لي متى تفكيرن بروحج وبس .. تدرين عاد لو قلبج فيه خير ما اختار الفراق اول مره
قلبي ( معصب ) : والله لو عقلج فيه خير جان فلحتي بدراستج ترا حمضتي بالكليه .. وبعدين لا ينسى الاخ ( عقلج ) ان انا الي اخترت الفراق بس اهو الي قرر
عقلي ( منحرج ) : الي فات فات واحنا عيال اليوم .. بس تذكري يا بنيه انج تظلمين روحج قبل لا تظلمينهم .. بتمين عايشه بأوهام و احلام تدرين انها ما تحقق
قلبي : تكفـيــن يا بنيه لا تقولينها راح تظلميني
عقلي : دوسي على قلبج ولو مره عشان هالناس الي تحبينهم يعيشون بسلام وما تهدمين بيت توه ينبني
قلبي : لو سمحت ارتقي بالكلام ما له داعي دوسي ما دوسي
عقلي : شوفي طريجج لا توقفين نصيبج .. هالحب بعد فتره بيكون ذكرى حلوه
قلبي : نصيبج انج تعيشين على حبه وما تظلمين نفسج مع غيره
انا : خلصتو الحجي ؟ قلتو الي عندكم ؟ بس مابي اسمع حس واحد فيكم



صار هدوء فجأه والدموع بعيني

قعدت افكر بكلامهم و اختلافهم بالراي

يعني انا مع نفسي مو متصافيه

عايشه بصراع داخلي بيني وبين نفسي

وبعد تفكير

عبدالله رويشد : انا بتبع قلبي وبس ما علي بالناس ..

انا : محد وهقي الا انت يا عبدالله طول عمري متبعه قلبي وشوف وين وصلت .. تدري شلون انا اقول غير الكلمات وسوها انا بتبع عقلي
وشوف امورك شلون تصير
عبدالله رويشد : ايه يا قلبي معاه مالك نصيب من فراقه لا تشب وتحترق
انا : بس يا عبدالله لا يسمعك قلبي مو ناقص عوار وانا بس بعتزل اغانيك بس عشان لا تذكره

هني كانو قلبي وعقلي ساكتين وفجأه

بصوت خفيف سمعت تمتمه

عقلي ( منزل راسه وبصوت حزين ) : تدري انا ما عاد اظن ان لي معاك قسمه ويا عزتي من القدر هو نده و خصمه .. قاوم هبوب العاصفه وهدته نسمه .. رقيقه ظالمه ما فقلبها رحمه

قلبي ( صرخ ) : يااااااااا من عرفت الليل واقف على بابك .. لأصرخ واهد الليل ما اتحمل غيــــــابك .. ما اتحمل غيابه ما اتحمل غيااااااااااابه

انا : ااااه يا حبيبي للاسف ما بيدنا حيله .. هذا نصيب قلوبنا ويا علها خيره .. كل شي حبيبي بينتهي وحبنا خالد .. صفحه تشع من البياض الله بها شاهد

لميت قلبي و عقلي و حاولت اكون اهدى وحده فيهم عشان نقدر نواجه
هالمشكله مع بعض وادري اختياري راح يزعل واحد فيهم
هذي اول خطوه عشان اعدل امور حياتي

القصه من خيال واقعي

عنوستي هي اختياري

السلام عليكـــــــــــــم

العنــــووووووووسه شبح يطارد البنات واكثر البنات يخافون منه

هذا عند البنات الطبيعيين بس عندنا احنا لا

احنا اربع بنات .. كل وحده اختارت العنوسه ولها اسبابها

مع الايام كنا قاعدين نضحك ونسولف قلنا لازم نسوي حزب

اسسنا حزب والي اسسته اهي اكبر وحده فينا

انا اطلقت اسم على الحزب ولأول مره حزب ( عانس بكيفي )

قعدنا ندور شعار حق هالحزب وساعدنا احد الشباب وهو صديق قال لنا هالشعار الحلو

عـنـــــــــــــوستي هي اختيـــاري

الشعار مقتبس اشكره .. بس وايد حلو

اعمارنا ما تساعد على ان نكون عوانس لان كلنا صغار فعلا

واصغر وحده فينا قبل شهرين صار عمرها عشرين سنه

الاسباب يمكن ما تختلف وايد ..

وحده عايشه على حب ( عشر سنين ) .. وهالحب للاسف ما راح يتوج بالزواج للظروف الصعبه

قررت تعيش عمرها تصون هالحب وعلى الذكرى ( على الذكرى انا عايش ولا غير هواك انسان )

يتقدمون لها وترفض بدون تفكير .. والحلو ان الريال بعد ما تزوج و عايش على حبها لي الحين :)

والثانيه افقدت حب طاهر و صادق وسامي ولا عمرها بتلاقي نفس هالحب

ظروف قويه ولحظة غباء منها اختارت الفراق ( اخ من الفراق )

و خلت الريال بروحه يسأل عمره ويجاوب عمره وبدون اسباب مقنعه

الريال حبها مات فيها وبالاخير خلته وراحت .. شنو اسبابها !! الله يعلم عنها

الريال قرر يتزوج ويشوف طريجه بس عشان ينساها وتزوج ( الله يوفجه )

عقب كل هذا ردت حست البنت بحبه وردت تدوره ولقته بأخضان غيرها

صارت تشوف الناس كلهم بهالريال .. ما تبي غيره

وثالثه عايشه قصة حب وترفض الي يتقدمون لها ناطره هالقصه تنتهي بزواج وانا شخصيا

اتمنى لها كل خير و الله يوفجهاااااا

اما الرابعه واهي العنونه فينا

مأجله فكرة الزواج لانها ما تؤمن بالزواج التقليدي بما ان الي تقدمو لها بدون سابق معرفه

يعني من مشجعين زواج الحب

ولي الحين الله ما كتب وشافت هالفارس

هالمعانات الي نعيشها احنا الاربع وغيرنا وايد من بنات الكويت وعند اكثر العوائل

شنو سببها ؟؟

انا اقول لكم ... تعسف الاهل

حضري ما يزوج بدوي .. بدوي ما يزوج حضري

حضري ما يزوج عيمي .. عيمي ما يزوج حضري

سني ما ازوج شيعي .. شيعي ما ازوج سني

القبيله الفلانيه ما تعطي الا القبيله الفلانيه

غني ما ازوج فقير

لا واذا تطابقو الاصول او المذاهب نيي حق سوالف ثانيه .. والله امها من الجنسيه الفلانيه

والله خالها غير مذهبه .. والله عمها كان بالسجن سنه من السنين

والله ريل خالتها مو كويتي

واخرتها محد ماكلها الا احنا البنات

مادري متى هالعقد بتروح من مجتمعنا ومتى بنعرف ان كلنا كويتيين ومسلمين

شلون تقدر ولا تقدرين تحرمين بنتج من الزواج ولا ولدج من الزواج

وانتي تدرين ان قلبها ولا قلبه متعلق

والله حرام

بالنهايه اي بنت تحب تنظم حق الحزب مالنا لازم تأدي القسم و لازم تنطبق عليها الشروط

المهم تكون فوق ال 14 سنه <<<< حدها مبجر

بعدين اقول لكم شنو انجازات الحزب ومميزاته

وعنوستي هي اختياري

ملاحظه : الي عنده رقم خطابه مضمونه و شغلها عدل مدل لا يبخل علينا ويكسب فينا اجر لوووول

حق الشماته يا سعد

السلام عليكم ورحمة الله وبركاته

يا أيها المُبدي الشماتة انتظِرْ عُقْباكإن الموتَ كأسُ مُديرِ

الشماته مرض اللهم يا كافي منتشر وايد للاسف عندنا بمجتمعنا الكويتي والخليجي

هالايام وايد سوالف صارت جدامي كلها شماته وهالشي ضيق خلقي وايد

ليش الشمـــــــــاته ..

بقول لكم المواقف الي صارت وكلها شماته ..

اولا على الصعيد الشخصي بالنسبه لي

امس كنت قاعده ادرس بمكتبة الكليه .. يت زميله لي وما اسميها صديقه مجرد زميله سلمت علي وطاحت عينها على الكتاب الي ادرسه

قالت : وااااااااااااااااااااااااي ( قلبي قام يرقع من الواي مالتها ) شخباري هالماده من صجج توج تاخذينها

انا : اي والله ما مشى حالي فيها وعدتها

اهي : فلاااااااااااانه تعالي شوفي تذكرين هالماده ( مع ابتسامه عريضه ) ترد الثانيه اي خذيناها عند الدكتور الفلاني وطلعت منها بي بلس وانتي طلعتي سي ..

انا : ( اطحن من داخل ) وعلى ويهي ابتسامه مجامله

الحمدلله والشكر انا شكو اذا انتو عباقره

الموقف الثاني مو معاي بس صار جدامي ..

قاعدين وعندنا وحده بالعايله ما تحمل بسهوله دائما حمالها مستعسر و كل مره ما يثبت الجنين عندها ..

وعندنا وحده ثانيه الحمدلله الله اكرمها بنعمة العيال والحين اهي حامل ..

تسأل الثانيه فلانه ماكو شي بالطريج .. ترد عليها لا والله لي الحين الله ما كتب

تقول لها ( بكل وقاحه ) : وييي والله احسن لج شلج بعوار الراس والدوخه والله لو يصير اعطيج الي فبطني اخذيييييييييييييييه ماابيه

انا : الله كريم يا فلانه !!!!!!!

الموقف الثالث والي مضيق خلقي وايد ومستغربه منه ..

ان في ناس يتشمتون بغزه والي صاير فيها .. واحد يقول احسن عساهم بهالحال واردى و ثاني يقول قلعتهم نسيتو شنو موقفهم ايام الغزو

انا مصدومه !! شنو هالقلوب القاسيه احنا من متى جذي .. الي قاعدين يموتون ابرياء اطفال و نساء و شيوخ

وين الانسانيه ؟ .. انا ما اقول لك روح جاهد ولا روح دافع معاهم

اكتفي بالدعاء لهم مدام احنا بحالة ضعف و الوسيله الوحيده اهي الدعاء

الموقف الاخير والي الحين صار فررررش ..

عقب خسارتنه من المنتخب السعودي

غيرت القناة وحطيت على قناة سكوب ولا اغاني تحبيط !!

حاطين صور المنتخب و مركبين عليه اغنية ( للصبر اخر خلاص عافك الخاطر )

و عقبها صورة الكاس ( محال محال محال عمر المحال ما يصير )

وعقب صورة نواف الخالدي ( اجر الصوت .. حسبي على الايام والحظ الردي )

بسرعه جذي نكسر بلواعيبنا !! واحنا نفسنا نتشمت بنفسنا شخلينه حق الغرب !

بس عجبني واحد دق على ابو عيده وقاله .. ( عيب) ما يصير الاغاني الي تحطونها

عجبني المتصل بس شوي خارها وقام يسب هم انا اقوله عيب انت على الهوا ..

وفوق هذا عندي رفيجتي بحرينيه هم تشمتت فيني لووول ..

الله يكفيكم شر الشماته يا بشر ..

قال عبد الله بن أبي عيينة : كلُّ المصائب قد تَمُرُّ على الفتى فتهونُ غير شماتةِ الـحُسَّادِ

والاهم حديث الرسول صلى الله عليه وسلم

((لا تظهر الشماتة بأخيك فيعافيه الله ويبتليك))

لـيـش ؟!

ليش ؟

ليش الناس تقرر متى تدش حياتك ؟

ليش الناس تقرر متى تطلع من حياتك ؟

ليش الناس يبيعون الي يشتري ؟

ليش الناس ما تراعي شعور الناس؟

يتلذذون ؟

يتغلون ؟

يبون يحسون بغلاتهم ؟

على حسابك ؟

يبررون انسحابهم بمصالحهم

ليش ؟

عشان ما تقدر تمنعهم دام فيها مصلحه لهم

انا !

انا من مصلحتي اني انسحب من حياتهم .. بس ليش ما اطلع من حياتهم !

ليش اهم يقدرون وانا ما اقدر ؟

وايد ناس باعوا ووايد ناس قدرو على النسيان

بس انا تعبت !!

كنت اقول حق روحي بس مابي اتعلق بأحد

عشان ما ايي يوم اتعب لما افقده

بس ما قدرت هم رديت وتعلقت فيهم

كـــــــــــافي تعبت من كثر الناس الي افترقت عنهم بهالدنيا

اصدقاء .. زملاء .. وحتى اهل

انا اكره المقوله ( عاشر من تعاشر فلا بد من الفراق )

سامحيني يا المعنيه بالبوست .. بس لما سمعت الخبر دمعت عيني ولقيت الوسيله الوحيده للفضفضه هني

اللـه كريــم

لا خــطـاويـنا

لا خطــاوينا وراها لقـــى وإن تــــلاقـــينا نـــتلاقى بــــشـــقى
ولازم واحـــد فيــــنا يضــحي يقــسى وينسى الذكرى ويمحي
ومــــهما دمـــعي ودمــعك هل بـــيدي وبيـــدك يبــقى الـــحل
إمـــا بــــجرحك ولا بجـــرحي لازم واحـــد فــيـــنا يــــضحي

يضحي :( التضحيه ) صعب وايد ان الانسان يضحي بحب ينبع من قلبه حب صادق حب يحمل جميع المعاني الساميه لهذي الكلمه

ينسى الذكرى : معقوله ان الانسان الي يحب ايي يوم ينسى فيه حتى الذكرى ؟ ( ابد مو مقتنعه )

إما بجرحك والا بجرحي : دام فالبعد والنسيان جروح ليش نبعد .. ظروف ؟ الحب اكبر من كل الظروف

يــا إنــت يــا أنــا مـــن هــو الـــلـي فيـــنا بــيـبــتــدي

خـــل نـــفتــعل الـــفراق ونــجرح الأشــواق دام الــحزن واحد

أدري تـــرد تــشــتاق ومــثـلــك أنا بأشــتاق بــس لازم نـعاند

ومــهــما دمـــعي ودمــعــك هــل بــيـدي وبــيــدك يــبــقى الحل

إمــا بـــجرحــك ولا بــجرحــي لازم واحـــد فــيــنا يــضــحي

نفتعل الفراق : ( الفراق ) ليش الهروب وافتعال الفراق ؟ واشلون نقدر نفتعل الفراق

نجرح الاشواق : ما عندي تعليق عليها غير انها كلمه قاسيه وايد وممكن العين تدمع منها

ترد تشتاق ومثلك انا بشتاق : هذي حصيلة الفراق .. ليش نفتعله دام بنتعذب من عقبه

لازم نعاند :( العناد ) ابشع صفه تدخل في علاقة حب بين طرفين وانا اقول مافي الحب عناد

لا لا تـــخـــاف حـــاول حــبــيبي حـــاول حبــيبي ولا تـــخاف

لا لا تـــخـــاف قــرر حبــــيـــبي قرر حبـــيـــبي ولا تـــخاف

مـــا بـــقى بــحـــبنــا بـــعـــــد شـــيّ عـــلــيه يــنـــخــاف

خــــل الــــحزن مرة يـــبـــدي ولـــو مرة بإختيــاري وبإخـــتيارك

ومـــهما دمـــعي ودمـــعك هل بــــيدي وبـــيدك يـــبقى الـــحل

إمـــا بـــــجرحك ولا بـــجرحي لازم واحـــد فــــينا يـــضحي

ما بقى بحبنا بعد شي عليه ينخاف : يأس و تخاذل بحق المشاعر .. مهما صار بالنهايه تبقى المشاعر موجوده ولها تقديرها

بإختياري وبإختيارك : منو واشلون يقدر يختار هالحل الصعب .. يدوس على قلبه ومشاعره .. ينهي حب وللابد

الغريب ان يقول لا تخاف حاول ولا تخاف وقرر !!

صـــــعـــــــب

طول عمري احب هالاغنيه واسمعها ومن اشد المعجبين فيها .. بس بصراحه الحين حاسه بقساوتها

اول مره اتمعن بالكلمات واركز فيها جذي كلمات تعور القلب

بالنهايه الله يعطيك طولة العمر يا بو خالد على الفن الراقي الي تقدمه

الاقربون اولى بالمعروف ..

بسم الله الرحمن الرحيم

شـنو يعني العائله ؟ منو الناس هذيل ..
سؤال غريب والاجابه معروفه طبعا منو اهم
الام والابو الاخوان والخوات وبعدين اليد واليده والخالات والخوال والعمام والعمات ... إلخ

الي بتكلم عنه ان من الطبيعي ان هالناس يكونون اقرب ناس حق كل شخص .. بس بالزمن الي احنا فيه ليش كل شي غير !!

( اتكلم عن الخوال والخالات والعمام والعمات وما بعد )
صارو هالناس اهم مصدر الهموم .. اهم اول ناس ينتقدونك ... اهم اول ناس يطالعون عيوبك
حتى اذا لا سمح الله وزليت فيوم من الايام بكلمة جدامهم
ما يلتمسون لك العذر ابد .. ما ياخذونها بحسن نيه
يبهرون الكلمه ويزيدونها ملح ويوصلونها لبعض
يحاولون كثر من يقدرون ان الكلمه تنتشر .. ليش ؟
عشان يكون عندهم شي ضدك و يكسبون اكثر الناس من صوبهم
يسوون عليك حزب .. تصير انت سالفتهم ليل ونهار
يتعمدون الحركات الي تغث يسوونها جدامك
ينبذونك من العايله .. جنهم ناطرين عليك الزله عشان بس يتخلصون منك

( الاقربون اولى بالمعروف )

شنو هالمعروف الي الحين نشوفه منهم ؟؟
حش .. نميمه ... فلانه سوت جذي وفلانه لبست جذي
تشويه سمعه جدام حتى الغريب !!
والله غريب يا اهلي .. يا( عزوتي ) .. يا سندي من بعد عين امي وابوي

وين يمعات الاهل القديمه ؟ وين اللمه الي ما تنمل .. راحت
زمن يتغير و يغير الاصدقاء و المعارف الي نكتسبها من الحياة اليوميه
بس يغير الاهل .. ما كنت اتوقع والله ابد

صار الهروب منهم احسن حل .. اليوم الي اعرف روحي بروح لهم يتأكسد مزاجي من اول ما ابطل عيني من النوم
طول اليوم متنرفزه .. ادش عندهم ينقمت قلبي
طبعا مجبوره اروح مره او مرتين بالشهر لانها صلة رحم
بنفس الوقت اروح عشان امي وابوي مو عشان احد ثاني

( المواجهه )

من الطبيعي بعد اي سوء تفاهم دام انك مو غلطان تواجه وما تخاف
الغريب انهم يرفضون المواجهه
شنو تفهم من جذي غير انهم بايعينك
بالنسبه لي اقول الله لا يسامح اي احد ظلمني
وما ابريهم الذمه لان حياتي تغيرت بسبتهم
..........
الله يرحمك يا بابا عود كنت ما ترضى بالغلط ومن بعد عينك محد يقدر يصد الغلط

هالشي موجود بوايد عوايل عندنا بس مو معناته ماكو عوايل عايشين مع بعض بدون هالخلافات
الموضوع وايد كبير .. بس انا تكلمت على لسان حالي

بالنهاية تعريف العائله بالنسبه لي : ابوي وامي واخواني وخواتي
عسى الله يخليهم لي واعيش بظلهم طول عمري

الحـــب خـالـد ...

السلام عليكـــــــم

اكيد العنوان يشوق مو ؟ ... ادري

حبيت افتتح مدونتي بهالعنوان وايد اتفائل فيه

الحب خالد .. خالد اقصد فيها صفة الخلود نفسها

يعني لا تفهموني غلط من البدايه

مافي شخص منا ما عاش قصة حب .. طبعا مو اي حب .. انا اقصد مشاعر الحب الساميه الصادقه

الحب الي يحسسك بالامان طول ما انت عايش يعني تنام وانت متطمن بوجود شخص يحبك حب صادق

تقعد من النوم تفكر ان هالشخص موجود وراح يكون يمك متى ما تحتاجه

شخص معاك 24\24 .. سبع ايام بالاسبوع .. 12 شهر على مدار السنه

يكون اهو حياتك اليوميه .. تفاصيل حياتك تتمحور على هالشخص تحس ان انت عايش عشانه وبالمقابل اهو عايش عشانك

هالحب بين طرفين ... فجأه

كل طرف بطريج .. الظروف احرمتهم من بعض .. شكثر؟؟ و لي متى ؟؟

دام انهم يحبون بعض وعايشين حق بعض اكيد نقدر نسأل هالاسئله

بس اذا دش طرف ثالث بالسالفه ؟؟

حتم عليهم القدر ما يعيشون مع بعض وبمعنى اخر ( غسلو ايدهم من بعض )

تزوج الريال لان طبعا ما راح ينطر طول عمره حب ما يقدر يوصل له

بعد كل الي بينهم ( حب حقيقي ) .. معقوله يندثر ! طبعاً لا

بيتم الحب موجود بينهم و يمكن ما يوقف يتطور اكثر واكثر .. الريال عند مرته وقلبه ينبض على حب وحده ثانيه

هني في ظلم للطرف الثالث انا عارفه بس ( مابي اتطرق للموضوع هذا)

خلونه بالطرفين الاول والثاني الي انظلموا

البنت تحب الريال .. وانتو عارفين البنت اذا حبت ما تملك التحكم بالمشاعر ابد .. تبي إتم عايشه عشان حبه

مستعده تضحي بالزواج والارتباط .. بس عشان تعيش على ذكرى وحب ريال ما تقدر ترتبط فيه

ظلم !! اي ظلم بس منو يقدر يقنعها ان الي تسويه بنفسها ظلم لها

ما تشوف الدنيا الحين جدامها الا بهالريال

ما يملي عينها الا اهو .. شلون راح تربط روحها بغيره

كل الي تسويه هالبنت ليش ؟

لان الحب ( خالد )

رايكم يهمني .. ""بموقف البنت"