الأحد، 9 أغسطس 2009

بداية النهاية .. ام بداية الطريق


من زمان مو متحلطمه بالمدونه واليوم احتجت لها لان بخاطري تحلطم

يأس كأبه
كسل
خمول
عصبيه
توتر
ضياع
فــــــــــــــشــــــــــــــل


كل هالاحاسيس مرت علي قبل 5 شهور تحديدا شهر مارس .. حسيت ان مشواري الدراسي انتهى
حسيت ان خلاص لحد هني

STOP

انا بالمكان الغلط .. التخصص الغلط .. الجامعة الغلط
الخوف من مصارحة الاهل من زمان كان مسيطر علي وخلاني اسكت على امل ان الامور تتحسن
وصلت درجة الانفجار .. ما قمت اداوم وخليت مادتين FA
كلمة صديقتي تدرس بمصر
قلت لها سالفتي قالت لي لازم تكلمين اهلج وانا مستعده اسوي لج كل شي اذا تيين تدرسين عندي بمصر
فاتحة اختي بالموضوع كانت متفهمه بس كان الخوف من الوالد
خطيت الخطوه الثانيه وكلمة امي وكانت ردة فعل قويه غير متوقعه من امي
سببت لي احباط فوق الاحباط
صرت اداوم بالكلية غصبن علي .. بالمحاظره جسم حاضر و عقل شارد
خلصت الكورس وعدا على مادتين FA
وماده F ومادتين D+
انتهى الكورس مع الانذار الثاني لإنخفاض المعدل

حاولت و حاولت ان اقنع امي على الاقل عشان اقدر ابطل الموضوع مع الوالد بس ماكو فايده
فكرت بالتطبيقي هني بالكويت بس هم ما لقيت قبول من امي
حجتها اني ما ادرس عدل و لاهيه عن الدراسه
مو راضيه تقتنع ان انا مو حابه التخصص ( هندسه ميكانيكية ) و اذا مو حابه التخصص ما راح اقدر ادرس
سلمت امري لله و قلت اكمل لي الاخر
ماخذه مادتين بالكورس الصيفي احاول اعدل الوضع
والكورس الاول راح يكون تحديد حق مصيري
يا اشيل الانذار واشد حيلي او انفصـل

شعور محبط لما تحس انك على كف عفريت مو عارف شنو مصيرك بخصوص دراستك
عدم الاستقرار يقتل .. يعني انا بطريج مادري شنو اخر هالطريج .. ما احب احد يسألني عن دراستي ومن يسئلوني بسرعه اتنرفز لو حتى السؤال بسيط
السؤال الي يذبحني لي درجة البجي ( متى راح تتخرجين ؟ )

حاسه بكبت ابي انفجر لان اليوم سألوني هالسؤال
الصج صج انا مو عارفه اجابته
قررت اسلوب حياتي كله يتغير مع بداية الكورس
راح ادرس اول بأول
راح اشد حيلي
راح اكون اكثر سلاسه مع الناس
املي ضعيف بس راح اتمسك فيه
ادعـوا لي بالتوفيق



هناك 11 تعليقًا:

  1. الله يوفقج ياااا باش مهندسه وييسر لج أمور دراستج وكل أمورج يااا رب :*

    ردحذف
  2. اذا الشخص كان مو حاب التخصص الي اهوه فيه صعبه انه يتأقلم مع الماده و يتفاعل معاها ويتجااوب
    حاولي على قد المستطاع تشدين حيلج والله يوفقج
    يعطيج الف عافيه

    ردحذف
  3. الله يوفقج و يهون عليج
    و يفرج عليج كربج و يشرح صدرج

    ردحذف
  4. جدامج الطريج وكل الحلول موجوده شدي حيلج والله يوفقج
    وإياج واليئس والاحباط وتفائلي صدقيني ماكو شي صعب الانسان ممكن يستغل ربع الفرصه ويكمل طريجه

    عسى الله يوفقج

    تحياتي ,
    :)

    ردحذف
  5. هند

    تسلمين حبوبه على الدعوه الطيبه :) نورتين :*


    المباركيه ..
    بالضبط هذا الي اعاني منه احاول اتقبل تخصصي ماني قادره خصوصا اني انجبرت عليه ما كان ميولي .. ان شالله خير الكورس الياي ومشكور على الدعاء

    Hop ...
    مشكوره اختي على الدعوه الحلوه وان شالله اجمعيين :*

    غير معرف ..
    مشكور على النصيحه و ان شالله بمشي عليها بالضبط و مشكور على الدعاء و يوفقك انت بعد
    تحياتي لك :)

    ردحذف
  6. الله يوفقج ان شا الله ويسهل امورج

    حسيت باحساسج بس الحمدلله انتهى

    الشعور بالضياع قاتل

    المفروض ما نخليه يتغلب علينا بس متى ما حسيتي نفسج ما تقدرين تتقبلين التخصص غيريه وما عليج من احد هذي حياتج انتي

    مو عيب الواحد يبدأمن البداية

    ردحذف
  7. بعد عمري والله كل هذا صارلج بهالغيبة
    لا ان شاء الله يتعدل الوضع مع شدة الحيل والتركيز وان شاء الله تكون بداية الطريج مو بداية النهاية - تفاءلوا بالخير تجدوه - انتي سوي الي عليج وخلي الباجي على رب العالمين وان شاء الله مايضيع تعبج

    موفقة يارب

    ردحذف
  8. إختي العزيزة, هذي أول مرة أدخل مدونتك والبوست أححست بشعور الإحباط الذي مررتي خلاله .. أمانة, مروا علي كثير من الناس في الجامعة قد كرهوا عيشتهم لأنهم اكتشفوا بعد زمن أنهم ليسوا في المكان المناسب وأنهم غصبن عليهم الإكمال حتى لا تضيع سنين الدراسة سدى. ولكن المشكلة أختي أن وظيفتك المستقبلية سوف تكون على نفس نمط الدراسة. والأمر ليس جيداً أن تتوظفي في مجال لا تحبينه .. من الأصدقاء من درس 4 سنين طب في إيرلندا, ثم اكتشف لاحقاً أنه ليس هذا ما يناسبه مع أنه كان متفوق في دراسته ثم حول إلى تخصص مستانس عليه وايد, واحد ثاني كمل ولايعة كبده ولما خلص ال7 سنين يبي يصير إداري بالمستشفى فقط! يعني حرام على السنين اللي درسها .. أعلم أن تخصصك صعب جداً, فلدي بعض الأصدقاء نفس تخصصك وأراهم يعانون كثيراً .. أنا أقول, قد تكون المادة دسمة وأنتي مو متقبلة الموضوع ويمكن صعبة على كل دفعتك مو بس عليك.. وقد يكون الشوط الذي قطعتيه طويل وحرام تحولين مع إن احترم رغبة الأهل ولكن أفضل أن الأهل يكون من جانبهم النصح والإرشاد وليس الإلزام كماهو معك .. فأنتي حرة في قراراتك ومستقبلك أولاً وأخيراً

    أحيي فيك روح التفاؤل والثقة .. وإن شاء الله تتخرجين وتفرحين الأهل بالشهادة وإن مع العسر يسرا .. إن مع العسر يسرا

    ردحذف
  9. أهم شي انج تكونين مقتنعة بالي قاعدة تدرسينه لان هذا شي راح يحدد مستقبلج...اهم شي انج :
    love what you do.. to do what you love
    good luck sweetie :)

    ردحذف
  10. best of luck w allah ysahil 3alaich.. sheday 7ailich w saway ily 3alaich wil baji 3ala allah

    ردحذف
  11. عسى ربي يوفقج ..و يمسح على قلبج ..
    استخيري.. و انشالله الله بيفتح عليج ..

    D:
    SMILE
    ****************

    ردحذف